امریکا میں کیے گئے ایک حالیہ عوامی جائزے سے ظاہر ہوتا ہے کہ شہریوں کی بڑی تعداد سابق صدر ڈونلڈ ٹرمپ کی ذہنی اور جسمانی صلاحیتوں کو صدارتی ذمہ داریوں کے لیے ناکافی سمجھتی ہے۔

یہ سروے امریکی اخبار واشنگٹن پوسٹ، ٹی وی نیٹ ورک اے بی سی نیوز اور تحقیقاتی ادارے اپسوس کے اشتراک سے کیا گیا، جس میں 59 فیصد شرکا نے رائے دی کہ ٹرمپ کی ذہنی استعداد ملک کی قیادت کے تقاضوں پر پوری نہیں اترتی۔

اسی سروے کے مطابق 55 فیصد بالغ افراد کا کہنا تھا کہ سابق صدر کی جسمانی صحت بھی اس اہم منصب کے لیے موزوں نہیں۔ دوسری جانب 40 فیصد شرکا نے انہیں قیادت کے لیے اہل قرار دیا، جبکہ ایک فیصد نے اس سوال پر کوئی رائے نہیں دی۔

مزید برآں، 67 فیصد افراد نے اس بات پر عدم اعتماد کا اظہار کیا کہ ٹرمپ اہم نوعیت کے فیصلے مؤثر انداز میں کر سکتے ہیں، جب کہ 44 فیصد شرکا نے اس مؤقف سے اختلاف کیا۔ ایک فیصد افراد نے اس حوالے سے بھی کوئی جواب نہیں دیا۔

یہ سروے ایسے وقت میں سامنے آیا ہے جب امریکا میں سیاسی فضا ایک بار پھر انتخابی مباحث اور قیادت کی اہلیت کے سوالات کے گرد گھوم رہی ہے۔