صوبائی دارالحکومت پشاور میں پیٹرولیم مصنوعات کی قیمتوں میں ممکنہ اضافے کی افواہوں نے شہریوں میں شدید بے چینی پیدا کر دی، جس کے نتیجے میں گزشتہ رات پیٹرول کی فروخت کے تمام سابقہ ریکارڈ ٹوٹ گئے۔ رپورٹ کے مطابق محض چند گھنٹوں کے دوران شہر میں ایک ارب روپے سے زائد مالیت کا پیٹرول اور ڈیزل فروخت کیا گیا۔
تفصیلات کے مطابق جمعرات کے روز صبح 10 بجے سے شروع ہونے والا خریداری کا یہ رجحان رات ساڑھے 11 بجے تک عروج پر رہا۔ پیٹرولیم ڈیلرز کے لیے یہ گزشتہ کئی مہینوں کے دوران منافع بخش ترین دن ثابت ہوا کیونکہ ریکارڈ مقدار میں ایندھن فروخت ہوا۔ تاہم، اس دوران عوام کو شدید مشکلات کا سامنا کرنا پڑا؛ شہر کے مختلف علاقوں میں واقع پیٹرول پمپس پر گاڑیوں اور موٹر سائیکلوں کی طویل قطاریں دیکھی گئیں جو دیر گئے تک برقرار رہیں۔
ذرائع کا کہنا ہے کہ قیمتوں میں اضافے کی غیر تصدیق شدہ خبروں نے شہریوں کو قبل از وقت ٹینکیاں فل کروانے پر مجبور کیا۔ ماہرین کا کہنا ہے کہ ایسی افواہیں نہ صرف مارکیٹ میں ہیجان پیدا کرتی ہیں بلکہ سپلائی چین پر بھی اضافی دباؤ ڈالتی ہیں، جس سے مصنوعی قلت پیدا ہونے کا خدشہ بڑھ جاتا ہے۔
.jpeg)
