تل ابیب میں سیاسی منظرنامہ ایک اہم تبدیلی کی جانب بڑھتا دکھائی دے رہا ہے، جہاں بنیامین نیتن یاہو کی حکومت کو نئے اتحاد کی صورت میں سخت چیلنج درپیش ہو گیا ہے۔

اسرائیل کے دو سابق وزرائے اعظم نفتالی بینیٹ اور یائیر لیپڈ نے اپنی سیاسی جماعتوں کو یکجا کر کے مشترکہ انتخابی اتحاد قائم کرنے کا اعلان کیا ہے۔

اس نئے اتحاد کا بنیادی ہدف آئندہ عام انتخابات میں موجودہ حکومت کو شکست دینا بتایا جا رہا ہے، جو اکتوبر 2026 میں متوقع ہیں۔ نفتالی بینیٹ کے مطابق نئی جماعت "ٹوگیدر" کے نام سے میدان میں آئے گی اور وہ خود اس کی قیادت کریں گے۔

انہوں نے اپنے بیان میں کہا کہ طویل عرصے کے بعد اب وقت آ گیا ہے کہ نیتن یاہو کی سیاست سے الگ راستہ اختیار کیا جائے اور ملک کی سمت کو تبدیل کیا جائے۔ یہ پیش رفت اسرائیلی سیاست میں آئندہ دنوں اہم اثرات مرتب کر سکتی ہے۔