پنجاب میں دیہی خواتین کو بااختیار بنانے اور روزگار کے مواقع فراہم کرنے کے لیے ایک اہم منصوبے کے تحت مزید 15 ہزار مویشی تقسیم کرنے کا فیصلہ کیا گیا ہے۔ اس پروگرام پر تقریباً ساڑھے چار ارب روپے لاگت آئے گی، جس کے تحت گائیں اور بھینسیں مستحق خواتین میں دی جائیں گی۔

حکام کے مطابق یہ سہولت خصوصی طور پر بیوہ اور طلاق یافتہ خواتین کے لیے مختص ہے تاکہ وہ معاشی طور پر خود کفیل بن سکیں۔ مویشیوں کی تقسیم کا عمل ضلعی سطح پر ڈپٹی کمشنر کی سربراہی میں قائم کمیٹیوں کے ذریعے مکمل کیا جائے گا۔

اعداد و شمار کے مطابق ڈی جی خان ڈویژن میں 6250، بہاولپور ڈویژن میں 3750 جبکہ ملتان ڈویژن میں 5000 مویشی تقسیم کیے جائیں گے۔

مزید تفصیل کے مطابق مظفرگڑھ، راجن پور، لیہ اور کوٹ ادو میں ہر ضلع کو 1250 مویشی فراہم کیے جائیں گے۔ اسی طرح بہاولپور، بہاولنگر اور رحیم یار خان میں بھی فی ضلع 1250 مویشی تقسیم کیے جائیں گے۔

حکام کے مطابق اس منصوبے کے تحت اب تک 9 ہزار جانور مستحق خواتین میں تقسیم کیے جا چکے ہیں۔ مزید یہ کہ اس اسکیم سے صرف وہی خواتین مستفید ہو سکیں گی جنہیں اس سے قبل کسی سرکاری پروگرام کے تحت مویشی فراہم نہیں کیے گئے۔ یہ اقدام دیہی معیشت کو مضبوط بنانے اور خواتین کی مالی خودمختاری بڑھانے میں معاون ثابت ہونے کی توقع ہے۔