عباس عراقچی نے پاکستان کی اعلیٰ سیاسی اور عسکری قیادت سے ٹیلیفونک رابطے کرتے ہوئے خطے کی مجموعی صورتحال اور جنگ بندی سے متعلق امور پر تفصیلی مشاورت کی۔

ایرانی ذرائع کے مطابق ایرانی وزیر خارجہ نے نائب وزیر اعظم و وزیر خارجہ اسحاق ڈار اور فوجی قیادت کے سربراہ عاصم منیر سے علیحدہ علیحدہ گفتگو کی۔ ان بات چیت میں خطے میں جاری کشیدگی اور ممکنہ سفارتی پیش رفت پر تبادلہ خیال کیا گیا۔

اطلاعات کے مطابق دونوں جانب سے جنگ بندی کے امکانات اور اس کے لیے درکار اقدامات پر بھی غور کیا گیا، جبکہ موجودہ حالات میں تعاون اور رابطوں کو مزید مؤثر بنانے پر اتفاق کیا گیا۔

واضح رہے کہ پاکستان حالیہ دنوں میں کشیدگی کم کرنے کے لیے سفارتی سطح پر سرگرم کردار ادا کر رہا ہے۔ اس سلسلے میں وزیر اعظم شہباز شریف، وزیر خارجہ اسحاق ڈار اور عسکری قیادت مختلف ممالک کے ساتھ مسلسل رابطوں میں ہیں تاکہ تنازع کے پرامن حل کی راہ ہموار کی جا سکے۔