اسٹیٹ بینک آف پاکستان نے تصدیق کی ہے کہ پاکستان نے متحدہ عرب امارات سے حاصل کیے گئے تمام مالیاتی ڈپازٹس واپس کر دیے ہیں، جس کے ساتھ ہی بقایا واجبات مکمل طور پر ختم ہو گئے ہیں۔

مرکزی بینک کے مطابق حالیہ ادائیگی کے طور پر ایک ارب ڈالر منتقل کیے گئے، جبکہ اس سے قبل بھی گزشتہ دنوں کے دوران بھاری رقم واپس کی جا چکی تھی۔ اس طرح مجموعی طور پر تین اعشاریہ پینتالیس ارب ڈالر کی ادائیگیاں مکمل کر لی گئی ہیں۔

حکام کا کہنا ہے کہ تمام رقوم طے شدہ معاہدوں اور مالیاتی طریقہ کار کے مطابق ادا کی گئی ہیں، جس سے پاکستان کی مالی ذمہ داریوں کی بروقت تکمیل ظاہر ہوتی ہے۔

دوسری جانب سعودی عرب کی جانب سے پاکستان کو تین ارب ڈالر کی مالی معاونت فراہم کی گئی ہے، جسے ماہرین معاشی استحکام کے لیے ایک مثبت پیش رفت قرار دے رہے ہیں۔