ایران میں جنگ بندی کی مقررہ مدت اختتام کے قریب پہنچنے کے ساتھ ہی حکومت کے حق میں عوامی سرگرمیوں میں نمایاں تیزی آ گئی ہے، جہاں مختلف شہروں میں شہریوں نے سڑکوں پر نکل کر ریاستی قیادت اور مسلح افواج سے یکجہتی کا اظہار کیا۔
ایرانی ذرائع ابلاغ کے مطابق مغربی شہر خرم آباد میں ایک بڑا عوامی اجتماع منعقد ہوا، جس میں مردوں اور خواتین کی بڑی تعداد شریک ہوئی۔ مظاہرین نے ریلی کی صورت میں مارچ کرتے ہوئے حکومتی پالیسیوں اور قومی سلامتی کے اداروں کے حق میں نعرے لگائے۔
اسی طرح اصفہان میں بھی بڑے پیمانے پر مظاہرہ دیکھنے میں آیا، جہاں خواتین کی نمایاں شرکت توجہ کا مرکز بنی۔ رپورٹس کے مطابق کئی برقعہ پوش خواتین بھی مظاہرے میں شریک تھیں، جن کی موجودگی کو سوشل میڈیا اور مقامی میڈیا میں خاص اہمیت دی گئی۔
بعض اطلاعات میں دعویٰ کیا گیا کہ مظاہرے میں شامل چند خواتین اسلحے کے ساتھ نظر آئیں، جن میں خودکار رائفلیں اور راکٹ لانچر جیسے ہتھیار شامل تھے، تاہم ان دعوؤں کی آزاد ذرائع سے تصدیق نہیں ہو سکی۔
یہ احتجاجی اجتماعات ایسے وقت میں سامنے آئے ہیں جب امریکی صدر ڈونلڈ ٹرمپ کی جانب سے ایران کے ساتھ ممکنہ معاہدہ ناکام ہونے کی صورت میں سخت اقدامات کی باتیں کی جا رہی ہیں، جس کے بعد ایران میں داخلی سطح پر ردعمل مزید مضبوط دکھائی دے رہا ہے۔
سیاسی مبصرین کا کہنا ہے کہ حالیہ مظاہرے ایک طرف قومی اتحاد کی علامت ہیں، جبکہ دوسری جانب بیرونی دباؤ کے مقابلے میں یہ ایک واضح سیاسی پیغام بھی تصور کیے جا رہے ہیں کہ ایرانی عوام اپنی ریاستی پالیسیوں اور دفاعی اداروں کے ساتھ کھڑے ہیں۔
