ملک کی تاریخ میں پہلی مرتبہ پاور سیکٹر کے ملازمین اور اہلکاروں کو فراہم کیے جانے والے مفت بجلی یونٹس کی سہولت ختم کر دی گئی ہے، جسے توانائی شعبے میں ایک اہم اصلاحاتی اقدام قرار دیا جا رہا ہے۔

وفاقی وزیر برائے پاور ڈویژن اویس لغاری نے لاہور ہائی کورٹ کے فیصلے کا خیر مقدم کرتے ہوئے کہا ہے کہ مفت یونٹس کے خاتمے کا مطالبہ عوام کی جانب سے طویل عرصے سے کیا جا رہا تھا، جو اب عملی شکل اختیار کر چکا ہے۔

انہوں نے کہا کہ یہ ایک اہم پیش رفت ہے اور موجودہ حکومت کو یہ اقدام کرنے کا موقع ملا، جس پر وہ شکر گزار ہیں۔

اویس لغاری کے مطابق حکومت مستقبل میں بھی ایسے فیصلے جاری رکھے گی جو قومی مفاد، ادارہ جاتی بہتری اور عوامی ریلیف کے لیے ضروری ہوں گے۔

ماہرین کے مطابق اس فیصلے سے بجلی کے شعبے میں مالی نظم و ضبط بہتر بنانے اور اضافی بوجھ کم کرنے میں مدد مل سکتی ہے۔