آبنائے ہرمز کی حساس صورتحال کے تناظر میں چین نے ایران کے مؤقف کی حمایت کرتے ہوئے اس اہم بحری گزرگاہ کو عالمی مفاد کے لیے محفوظ رکھنے کی ضرورت پر زور دیا ہے، جس کے بعد خطے میں سفارتی سرگرمیوں میں تیزی دیکھنے میں آ رہی ہے۔
چین کے وزیر دفاع ڈونگ جُن نے اپنے بیان میں کہا کہ بیجنگ اور تہران کے درمیان تجارت اور توانائی کے شعبوں میں گہرے تعلقات موجود ہیں، اسی لیے چین خطے کی بدلتی صورتحال پر مسلسل نظر رکھے ہوئے ہے۔
انہوں نے واضح کیا کہ آبنائے ہرمز میں چینی بحری جہازوں کی نقل و حرکت معمول کے مطابق جاری ہے اور کسی قسم کی رکاوٹ کا سامنا نہیں۔ ان کے مطابق یہ آبی گزرگاہ خطے کے ممالک کے لیے نہایت اہمیت کی حامل ہے اور اس کا کھلا اور محفوظ رہنا عالمی معیشت کے لیے ضروری ہے۔
چینی وزیر دفاع کا کہنا تھا کہ یہ راستہ ایران کے کنٹرول میں ہے اور چین کے لیے بدستور دستیاب ہے، تاہم انہوں نے دیگر ممالک کو بالواسطہ پیغام دیتے ہوئے کہا کہ اس معاملے میں غیر ضروری مداخلت سے اجتناب کیا جانا چاہیے۔
بیان میں مزید کہا گیا کہ چین عالمی سطح پر امن اور استحکام کے فروغ کے لیے اپنا مثبت کردار جاری رکھے گا اور خطے میں کشیدگی کم کرنے کے لیے سفارتی کوششوں کی حمایت کرتا رہے گا۔
تجزیہ کاروں کے مطابق چین کا یہ مؤقف نہ صرف ایران کے لیے سفارتی تقویت کا باعث بن سکتا ہے بلکہ آبنائے ہرمز کے معاملے پر عالمی طاقتوں کے درمیان نئی صف بندی کا اشارہ بھی دے رہا ہے۔
