تہران: ایرانی وزارتِ خارجہ کے ترجمان اسماعیل بقائی نے انکشاف کیا ہے کہ امریکا اور ایران کے درمیان ہونے والے حالیہ مذاکرات میں کئی امور پر پیش رفت ہوئی، تاہم چند اہم نکات پر اختلاف کے باعث حتمی معاہدہ طے نہیں پا سکا۔

میڈیا سے گفتگو کرتے ہوئے اسماعیل بقائی نے بتایا کہ یہ مذاکرات گزشتہ ایک سال کے دوران ہونے والا سب سے طویل دور تھا، جو تقریباً 24 سے 25 گھنٹوں تک جاری رہا۔ ان کے مطابق دونوں فریقین نے متعدد معاملات پر اتفاقِ رائے حاصل کر لیا تھا، لیکن دو سے تین کلیدی مسائل ایسے تھے جن پر اختلاف برقرار رہا اور یہی رکاوٹ معاہدے کی راہ میں حائل بنی۔

انہوں نے کہا کہ دیگر کئی نکات پر بھی دونوں ممالک کے درمیان مؤقف میں فرق موجود ہے، جس کے باعث مکمل ہم آہنگی پیدا نہیں ہو سکی۔ تاہم انہوں نے واضح کیا کہ مذاکراتی عمل کو ناکامی قرار دینا درست نہیں ہوگا۔

ترجمان نے زور دیا کہ سفارت کاری ایک مسلسل عمل ہے جو کبھی ختم نہیں ہوتا، بلکہ یہ قومی مفادات کے تحفظ کا اہم ذریعہ ہوتی ہے۔ ان کے بقول یہ توقع رکھنا حقیقت پسندانہ نہیں تھا کہ ایک ہی نشست میں تمام معاملات طے پا جائیں گے، اور نہ ہی کسی فریق کو ایسی امید تھی۔

اسماعیل بقائی نے مزید کہا کہ ایران خطے میں اپنے دوست ممالک کے ساتھ رابطے جاری رکھے گا، خصوصاً پاکستان کے ساتھ تعلقات کو اہم قرار دیتے ہوئے انہوں نے پاکستان کی حکومت، عوام اور وزیر اعظم شہباز شریف کا شکریہ ادا کیا۔

تجزیہ کاروں کے مطابق اگرچہ مذاکرات کسی حتمی نتیجے تک نہیں پہنچ سکے، تاہم جاری سفارتی روابط اس بات کی نشاندہی کرتے ہیں کہ دونوں ممالک مستقبل میں بات چیت کا دروازہ کھلا رکھنا چاہتے ہیں۔