پیانگ یانگ : شمالی کوریا کی قیادت نے ایران کے خلاف امریکی اقدامات پر شدید ردعمل دیتے ہوئے انہیں ریاستی سرپرستی میں کی جانے والی دہشت گردی اور کھلی جارحیت قرار دیا ہے۔
پارلیمنٹ سے خطاب کے دوران شمالی کوریا کے رہنما کم جونگ ان نے کہا کہ ایران کے ساتھ حالیہ تنازع اس بات کا واضح ثبوت ہے کہ ان کا ملک جوہری ہتھیاروں کے حصول کو اپنی سلامتی کے لیے ضروری سمجھتا ہے۔ ان کے مطابق موجودہ عالمی حالات ایسے اقدامات کو تقویت دیتے ہیں۔
انہوں نے امریکہ پر الزام عائد کیا کہ اس کی پالیسیاں بین الاقوامی قوانین اور خودمختار ریاستوں کے اصولوں کے منافی ہیں۔ ان کا کہنا تھا کہ ایران کے خلاف کارروائیاں عالمی امن کے لیے خطرہ بن سکتی ہیں۔
اس سے قبل بھی شمالی کوریا نے ایران کے جوہری تنصیبات پر مبینہ امریکی حملوں کی سخت مذمت کرتے ہوئے ڈونلڈ ٹرمپ کی انتظامیہ کو تنقید کا نشانہ بنایا تھا۔ پیانگ یانگ کا مؤقف تھا کہ ایسے اقدامات اقوام متحدہ کے چارٹر اور ایران کی علاقائی خودمختاری کی صریح خلاف ورزی ہیں۔
تجزیہ کاروں کے مطابق شمالی کوریا کا یہ بیان ایک ایسے وقت میں سامنے آیا ہے جب عالمی سطح پر طاقتوں کے درمیان کشیدگی میں اضافہ دیکھا جا رہا ہے، جو خطے میں مزید عدم استحکام کا باعث بن سکتا ہے۔
