شیر افضل مروت نے دعویٰ کیا ہے کہ مارچ 2026، سہیل آفریدی کے وزارت کے منصب پر فائز رہنے کا آخری مہینہ ثابت ہوگا۔ نجی ٹی وی سے گفتگو میں انہوں نے پارٹی کے اندرونی معاملات اور بعض رہنماؤں کے کردار سے متعلق کئی چونکا دینے والے دعوے کیے۔

پاکستان تحریک انصاف سے وابستہ رہنما نے علیمہ خان پر سخت تنقید کرتے ہوئے کہا کہ پارٹی میں بعض حالیہ فیصلوں اور پالیسی اقدامات کے پیچھے انہی کا اثر و رسوخ کارفرما رہا ہے۔ ان کا کہنا تھا کہ ریلیز فورس کی تشکیل کا مطالبہ بھی علیمہ خان کی جانب سے سامنے آیا تھا اور پارٹی کی موجودہ صورتِ حال میں ان کے کردار پر سنجیدہ سوالات اٹھ رہے ہیں۔

مروت نے یہ بھی الزام عائد کیا کہ علیمہ خان نے مختلف ادوار میں پارٹی قیادت کے درمیان اختلافات کو ہوا دی۔ انہوں نے دعویٰ کیا کہ بعض ذاتی اور سیاسی تنازعات میں بھی ان کا کردار رہا، جبکہ بشریٰ بی بی اور علیمہ خان کے درمیان تعلقات میں کشیدگی کے حوالے سے بھی گفتگو کی۔

انہوں نے مزید کہا کہ پارٹی ایک بڑی سیاسی و مالی قوت بن چکی ہے اور اس کے اندرونی فیصلوں پر چند افراد کا غیر معمولی اثر ہے۔ ان کا دعویٰ تھا کہ علیمہ خان پارٹی قیادت کے حلقے میں سب سے بااثر اور مالی طور پر مضبوط شخصیت ہیں۔

شیر افضل مروت نے علیمہ خان پر مالی بے ضابطگیوں سے متعلق بھی سنگین الزامات لگاتے ہوئے کہا کہ اگر ان کے دعوے غلط ہیں تو ان کے خلاف قانونی کارروائی کی جائے۔

واضح رہے کہ ان الزامات پر علیمہ خان یا پارٹی کی اعلیٰ قیادت کی جانب سے تاحال کوئی باضابطہ ردِعمل سامنے نہیں آیا۔ سیاسی مبصرین کے مطابق یہ بیانات پارٹی کے اندر جاری اختلافات کو مزید نمایاں کر سکتے ہیں۔

۔