ضلع لوئردیر میں حالیہ موسلادھار بارش اور پہاڑی علاقوں میں برفباری کے باعث سردی کی شدت میں نمایاں اضافہ ہو گیا ہے۔ مسلسل خراب موسم کے باعث بالائی علاقوں میں آمدورفت متاثر ہونے کی اطلاعات موصول ہوئی ہیں، جبکہ بعض مقامات پر برفباری کے سبب راستوں کی بندش بھی دیکھی گئی۔

انتظامیہ کے مطابق وادی لرم، شاہی، بن شاہی، کامرانی اور تالاش سمیت مختلف پہاڑی مقامات پر جانے والے سیاحوں کو محتاط رہنے اور غیر ضروری سفر سے گریز کی ہدایت کی گئی ہے۔ حکام کا کہنا ہے کہ خراب موسمی صورتحال کے دوران احتیاطی تدابیر اختیار نہ کرنے کی صورت میں مشکلات کا سامنا ہو سکتا ہے۔

دوسری جانب شدید موسم کے باعث ضلع کے مختلف علاقوں میں بجلی کی فراہمی متاثر ہے، جس سے مقامی آبادی کو مشکلات پیش آ رہی ہیں۔ انتظامیہ صورتحال پر نظر رکھے ہوئے ہے اور شہریوں و سیاحوں سے تعاون کی اپیل کی گئی ہے۔