عالمی مارکیٹ میں سونے کی قیمتوں میں مسلسل اضافے کے باعث پاکستان میں بھی سونے کی قیمت نئی بلندیوں کو چھونے کے قریب ہے۔ جمعرات کو عالمی سطح پر اسپاٹ گولڈ تقریباً 5600 ڈالر فی اونس کی ریکارڈ سطح کے آس پاس ٹریڈ کرتا دیکھا گیا، جس کے اثرات مقامی مارکیٹ پر بھی نمایاں ہیں۔

ماہرین کے مطابق عالمی جغرافیائی کشیدگی، معاشی بے یقینی اور سرمایہ کاروں کی محفوظ سرمایہ کاری کی جانب رجحان سونے کی قیمتوں میں اضافے کی بنیادی وجوہات ہیں۔ اسی دوران چاندی کی قیمت بھی عالمی منڈی میں 120 ڈالر فی اونس کے قریب رہی۔

اعداد و شمار کے مطابق ایک ٹرائے اونس میں 31.10 گرام سونا شامل ہوتا ہے، جس حساب سے عالمی مارکیٹ میں فی گرام سونے کی قیمت تقریباً 180 ڈالر بنتی ہے۔ چونکہ پاکستان میں سونا تولہ کے حساب سے فروخت ہوتا ہے اور ایک تولہ تقریباً 11.66 گرام کے برابر ہے، اس لیے عالمی سطح پر فی تولہ سونے کی قیمت 2100 ڈالر کے لگ بھگ بنتی ہے۔

ڈالر کے مقامی ریٹ، ٹیکسز، جیولرز کے منافع اور دیگر اخراجات کو شامل کرنے کے بعد پاکستان میں آج فی تولہ سونے کی قیمت 5 لاکھ 90 ہزار روپے سے تجاوز کرنے کا امکان ظاہر کیا جا رہا ہے، تاہم مقامی سطح پر قیمت میں رد و بدل ممکن ہے۔

ماہرین کا کہنا ہے کہ اگر عالمی غیر یقینی صورتحال برقرار رہی تو سونے کی قیمتوں میں اتار چڑھاؤ کا سلسلہ جاری رہ سکتا ہے، جبکہ سرمایہ کار بدستور سونے کو محفوظ اثاثہ تصور کر رہے ہیں۔