اسلام آباد:  محکمہ موسمیات نے آئندہ 12 گھنٹوں کے دوران ملک کے متعدد علاقوں میں موسم کی خرابی برقرار رہنے کی پیشگوئی کی ہے۔ موسمیاتی حکام کے مطابق خیبر پختونخوا، آزاد کشمیر، گلگت بلتستان، اسلام آباد، شمال مشرقی پنجاب اور شمال مشرقی بلوچستان میں تیز ہواؤں کے ساتھ گرج چمک کی بارش متوقع ہے، جبکہ پہاڑی علاقوں میں مزید برفباری کا امکان ظاہر کیا گیا ہے۔

محکمہ موسمیات کا کہنا ہے کہ وفاقی دارالحکومت اسلام آباد اور پشاور میں وقفے وقفے سے بارش کا سلسلہ جاری رہ سکتا ہے، جبکہ مری اور گرد و نواح میں شدید سردی کے ساتھ وقفے وقفے سے بارش اور بھاری برفباری متوقع ہے، جس سے معمولاتِ زندگی متاثر ہونے کا خدشہ ہے۔

خیبر پختونخوا کے مختلف اضلاع بشمول چترال، دیر، سوات، کالام، شانگلہ، کوہستان، بٹگرام، مانسہرہ، ایبٹ آباد، پشاور، چارسدہ، نوشہرہ، صوابی، مالاکنڈ اور مردان میں بارش جبکہ بالائی علاقوں میں برفباری کی پیشگوئی کی گئی ہے۔ اسی طرح کوہاٹ، کرم، خیبر، ہنگو، پاراچنار، باجوڑ، بنوں، لکی مروت، ٹانک، کرک، ڈیرہ اسماعیل خان اور وزیرستان میں بھی بارش اور برفباری کے امکانات موجود ہیں۔

دوسری جانب بلوچستان کے شمالی اور مغربی علاقوں میں موسم شدید سرد رہنے کا امکان ہے۔ کوئٹہ، زیارت، چمن، پشین، قلعہ عبداللہ اور قلعہ سیف اللہ میں برفباری متوقع ہے، جبکہ نوشکی، ہرنائی، ژوب، قلات، بارکھان، سبی اور لورالائی میں بارش کی پیشگوئی کی گئی ہے۔

محکمہ موسمیات کے مطابق ملک کے دیگر حصوں میں موسم سرد اور خشک رہنے کا امکان ہے۔ تاہم شہریوں کو ہدایت کی گئی ہے کہ وہ ممکنہ موسمی اثرات، پھسلن، سڑکوں کی بندش اور حدِ نگاہ میں کمی کے پیش نظر احتیاطی تدابیر اختیار کریں، خاص طور پر پہاڑی علاقوں میں سفر سے قبل موسم کی صورتحال ضرور معلوم کریں۔